“Erritmoa, euskaldunen erritmoa” antzeman zuen taula gainean Sho-k, Bilboko Arriaga Antzokira estreinaldia ikustera etorri zen japoniar euskaldunak. “Egia esan, hunkigarria izan da, asko gustatu zait” aitortu zigun. Esker onekoa eta alaitsua, emanaldia eta gero berarekin egoteko aukera izan genuen; hori bai hunkigarria, japoniar batekin euskaraz hitz egitea!

Oholtza gainean ikusitakoak adierazteko “hitzik ezin dut aurkitu”. Herritmo, bere hitzetan, “euskaldunen erritmoa, musika, hitzak, dantza… eta herri kirolarena, hori harriagarria da”. Euskal kulturaren “mundu ikuskera ireki” dugula ere aipatu zigun. Gure aldetik, ere, asko pozten gara hain iritzi positiboa jasotzeaz eta guk ere eskerrak eman nahi dizkizuegu Herritmo ikustera hurbildu zareten guztioi. Plazer handia da bi urteko lana konpartitzea!

Sho ezagutu genuenetik badira hamairu urte. Oreka Tx-ekoak, Kepa Junkerarekin, Japonera joan eta, kasualitatez, ezagutu genuen elkar. Sho, euskal liburuen itzultzaile bezala lan egiten zuen eta hori izan zen lehen topaketa. Eskerrak eman nahi dizkiogu guztiagatik, baita hizkeltaldian esandako azken hitz hauengatik: elkar ezagutu genuenetik “haien musika nire ondoan, bihotzaren barruan, eraman dut”.

Elkarrizketa osoa hemen.

ありがとうございました！